故宮、圓明園、避暑山莊、頤和園、天壇、皇陵等古建築聞名中外，唔講唔知，中國六份之一嘅世界文化遺產都蘊含「樣式雷」嘅身影，所謂「樣式雷」係清代姓雷嘅建築世家，佢哋一族多人先後掌管皇家建築設計機構樣式房，因而得名。「樣式雷」家族之中，始祖雷發達嘅事跡，係同康熙時期重修太和殿嘅傳說有關？

據講康熙年間，要重修紫禁城等級最高嘅建築太和殿，需要嘅大大碌嘅樑木，根據《哲匠錄·樣式雷考》所講，當時搵唔切咁大棵樹或者木頭，所以就諗住用明朝皇陵大殿嘅樑木。班官員搵咗個吉日，安排太和殿上樑，康熙仲著埋禮服親自參與大典。

點知碌木升高之後，居然同個榫唔啱位，接唔上，搞到工部嘅官員你眼望我眼好愕然，唔知點算好，非常心驚。有個官員靜雞雞幫有份修太和殿嘅工匠雷發達著咗套官服，等雷發達夠資格現身，佢三爬兩撥就上咗樑頂，然後响袖入面掹咗把斧頭出嚟，起勢扑兩扑，條樑就同榫穩妥結合。

康熙當堂龍顏大悅，於是授予雷發達工部營造所長班嘅職位。而依件「金殿封官」嘅事跡為當時人所流傳，出現「上有魯班，下有長班」嘅說法。雖然有人反駁個傳說，話獲皇帝讚賞嘅係第二代傳人雷金玉先啱，同埋地點係圓明園而唔係太和殿等等，不過雷家對清代皇家建築嘅貢獻同影響的確堅過石堅。

原圖嚟自網絡。